NOHO MARAE KI KATIHIKU

 

Uea! Uea!

Uea a Ranginui e tū nei

Uea a Papatūānuku e takoto nei

Uea te wainuku, uea te wairangi

Wātea ki uta, wātea ki tai.

Horahia te au nui, te au roa, te au tapu

O Te Moana-nui-ā-Kiwa e!

Ko Te Moana-nui-ā-Kiwa te kaupapa here matua i tēnei tau. Koinā te kaupapa e paihere ana i te kura i tā mātou noho tahi ki te marae o Katihiku i tērā wiki. I whakatauria te kura ki roto i te whare o Tamatehura e te hau kāinga, e Ngāti Huia. Nō muri mai i te whakatau, i whakawehea te kura ki ngā Ohu me te aro ki ngā kōrero huhua mō te mōteatea a Papa Sean, a E Ara Tainui. I konei, whāngaihia ana ngā kōrero hītori mō te takenga mai o te waka o Tainui, mai i te rākau e tupu ana ki runga i te rua kōiwi o te pēpi Tainui i whānau tahe mai.

Nō muri mai i te kai o te ata ka whakaturia ngā tēneti ki te marae ātea, ka whakaritea ngā wāhi moe ki roto i ngā whare i te marae. Maringanui ana mātou e kaha whiti mai ana ngā hīhī o te rā e pai ai tā mātou whakatū i ngā tēneti.

Ka mutu te kai o te rānui, ka whakaritea ngā kahukau, ka hoatu ki ā mātou tueke, ā, ka taki haere atu mātou te kura ki te ngutu awa o Ōtaki, ki reira pāinaina ana e te rā, rukutia ai ngā wai o Maru ki te awa. Kāore i kō atu kāore i kō mai te noho ki te taha o te awa, he hau mahana e pupuhi mai ana, he mātao te wai, e tangi ana ngā karoro o te takutai.

Te hokinga atu ki te marae, kātahi ka tino rongo ki te roa o te rā. I patua rawatia mātou e te hiamoe me te ngēngē. Maringanui ana ngā teina, ka hoki atu mā runga i ngā waka roa!