Google Certified Educator - Level 1

GOOGLE CERTIFICATION

Level 1

DFI - Wk #9 - Revision

 DFI - Wk #9

"Revision"

E hoki atu ana ngā mahara ki te tīmatanga o taku hoe, i taku whakatere i te waka DFI ki te moana o Manaiakalani, e tupou ana te māhunga ki ngā kaihautū o te waka i ārahi i ā mātou ngā kaihoe kia ngātahi te hoe ki te ake ake o te ao matihiko! Ahakoa i haukerekeretia te waka e ngā ngaru tupuhi, i ngā ngaru tūātea, ka tapatahi ngā whakaaro ki ngā tini akoranga i whāngai i roto i ngā wiki e iwa kua pahure.

I tīmata te rā ki te kauhau nā Dorothy mō te "ubiquitous". Tē mārama i a au te tikanga o te kupu nei, engari nā wai nā wai ka kitea tōna whakamahinga i te horopaki o te ako, arā, "Life long learning anywhere, anytime, at any pace by anyone. Living local, learning global..."

HE AROTAKE

• NGĀ MEA I WHAI HUA:

• He nui ngā akoranga i mau i a au, ā, i whakahoki atu ki te akomanga ki āku tamariki. He rawe te Google Drawing, Google Slides, te whakapai haere i taku Pātaka Kukara (Google Drive), te whakahaere i taku wāhi īmera mahi tae noa mai ki taku ako me pēwhea te pōhi ki taku rangitaki!

• NGĀ AUHEKETANGA:

• I tūpono au ki ētehi uauatanga i taku haerenga ako matihiko; pēnei i te mau i ngā āhuatanga whakahaere o te Google Slides me te reo tuhi waehere. 
• I te mea kāore au e kaha te whakamahi i ēnei taupānga i te akomanga, i te kāinga rānei, ka whakarerea. Heoi, i mau tonu i a au ētehi mōhiotanga kāre i mau i a au i te tīmatanga o taku ako i ēnei kaupapa huhua.

• TE AHU WHAKAMUA:

• He ara mutunga kore tā tātou e takahia ana, me pēwhea rā hoki e tūtaki i te tatau o te ako? Maringanui ana tā mātou mirumiru i te momo o te pūkenga o Makaore, nāna mātou i ārahi, i ako, i poipoi i roto i ngā tini akoranga i ngā wiki e iwa nei.
• He tangata manawanui, he manawaroa e whakaaro nui ana ki te kaupapa o Manaiakalani me ōna tini hua mō ngā tamariki e noho marara ana i te mata o te whenua.

HE KUPU WHAKAMUTUNGA

Hei whakakapi ake i aku kōrero ki tēnei, ki taku pōhi whakamutunga mō te kaupapa, e rere arorangi ana aku mata ki te pīnakitanga o te maunga taioreore o te hangarau matihiko. He rite tonu ki te maunga e kake ai te tangata i ōna taumata; he akoranga hou, he taumata i piki. Kei pōhēhē ahau kua tae ki tōna tihi, kua mau i a au ngā akoranga hei whakamau māku - e hē! Heoi anō, ko te ara i takahia, i pikitia ai e riro ai ngā hua o te ako, he tīmatanga noa iho tēnei i taku haerere haere i te ao matihiko e noho nei tātou.

Kei ōku hoa ako i tō tātou mirumiru reo Māori, me poho kereru tātou i ā tātou mahi! Nōku te maringanui i whirinaki au ki tētehi rōpū noho pūmau ana ki te reo Māori. Nā koutou au i morimori, i whakakata, i āwhina me kore noa e tau mai he māramatanga ki ngā tini kaupapa i whāngai mai ki a tātou. 

Hoake tātou me tā tātou tohu matihiko ki te anamata, whītikina ā tātou hoe kia wāhi ai ngā wai uriuri o te moana nui.

Kāti au i konei!

DFI - Wk #8 - Computational Thinking

 DFI - WK #8

"Te tuhura i ngā tuhinga waehere"

E tauhou katoa ana ahau ki te reo tuhi waehere. Heoi, kua kite au i ngā hua pai i taku mātakitaki i a Makaore e whakahaere ana, e whakaako ana i ngā akoranga tuhi waehere ki te taha o tōku reanga i te kura ki te kēmu, Minecraft. 

He reo rerekē rawa, ānō nei ko te reo kōrero tonu o te rorohiko. Ka patohia ngā tohutohu hei reo waehere, ā, ka ea ai te mahi e pīrangitia ana.

I noho tahi ki a Makaore ki te waihanga i tētehi tuhinga waehere mā te code.org. Me pēnei taku kōrero, nā wai ka hē ka tino hē rawa atu! I raru hoki taku hono atu ki te ipurangi nā te pōturi rawa o te iarere, nā konā raru ai taku whakaatu i āku mahi ki tōku hoa. Heoi anō, ahakoa te roa o taku noho ki te whakaoti i taku tuhi waehere, i te mutunga iho, i tau ki a au tētehi mōhiotanga hou kāre i a au i te tīmatanga o ngā mahi, ka mātua rā i tēnā!

Anei he hononga ki āku mahi: Dance Party

DFI - Wk #7

 DFI Wk #7

"Devices"

Mā te āta whakaako i ngā tino uaratanga o te tū atamai i te ipurangi e tino haumaru ai te tangata i tāna tuhura i te ipurangi, otirā kia tika ai ngā kōwhiringa a te kaituhura. Mā te aha i te noho ki te wānanga me aku tamariki i te kura i ngā tino uaratanga o te tū atamai i te ipurangi me ōna piki me ōna heke. Koinei i whakaturia ai e ngā kura te Kawa Tiaki, hei tiaki i te ākonga i tāna noho ki te ao matihiko. Koinei hoki te tīmatanga ki te whakamahi i ngā pūrere matihiko, me pūrangiaho te māramatanga o te ākonga me te pouako ki ngā mātāpono, ki ngā tikanga whakahaere kua tuhia ki te Kawa Tiaki, me kore noa e tūpono ki ngā raruraru i te ao matihiko.

E whakaako ana ki ā mātou tamariki kia pai tā rātou waiho i ā rātou tapuwae matihiko mō rātou, ā, mō ngā rā kei te heke tonu mai. Ki konei, me kaha hokihoki ngā pouako ki te wānanga i ngā kōrero o te Kawa Tiaki, kei warewaretia, kei kōtiti ngā ākonga i tā rātou tuhura ki te ao matihiko.

"KARIA TE KARINGA MATIHIKO"

Ngā pātuhi pokatata pukakita

I noho mātou mō tētehi wāhanga nui i te rā nei ki te aro ki ngā pātuhi pokatata mō ngā pukakita me ngā rorohiko āporo. He akoranga nui ēnei māku, otirā kia mātua mōhio ai te pouako ki ēnei huarahi "poto" e pai ai te āwhina atu i ngā tamariki i roto i ngā akomanga. 

Ki te whakaaro ahau ki ngā tamariki kei taku reanga ināianei, hika, ko rātou kē kei te whakaako mai ki a au me pēwhea!

Anei e whai ake tētehi hononga ki ngā mahi nō te rangi nei, Ngā pātuhi pokatata pukakita.

   ĒTEHI TAUIRA MAHI NŌ TE RANGI NEI

Explain Everything - Ingoa:

Explain Everything - Whakaahua:

Explain Everything - īPapa:

Tōku Hoa Piripono

 Tōku Tino Hoa

Ko ________________ te ingoa o tōku tino hoa, o tōku hoa piripono. Kua roa māua e noho ana hei hoa, mai i te wā i tīmata ai māua i te Kōhanga Reo, ā, tae noa mai ki tēnei wā ki te Whānau Huia.

He kaha nō māua ki te noho tahi, kōrero tahi, tākaro tahi, otirā te whakawhanaunga tahi. He wā tōna ka haere mai a _________________ ki tōku whare, ā, ka noho tahi. Ka eke i ō māua paihikara, a, ka paihikara ki tātahi, ki te awa i ngā rā paki. Kātahi ka haere ki te toa whiti tipi, hokona mai he kai mā māua.

Ka kaha tōku hoa ki te whakarongo ki ōku whakaaro me āku kōrero, ā, kāore hoki ia e noho mai ana ki te whakawā i a au. Kei reira ia mōku i ngā wā o te taumaha, i ngā wā o te hari, i ngā wā e pōuri ana tōku ngākau, ka whakapiki ia i tōku wairua. Ki a au nei, koinei te tino pūmanawa o te hoa pūmau - ka tautokona koe ahakoa te aha.